Buugani wuxuu ka mid yahay buugaagta la gaarka ah eray-raadinta iyo xallinta hal-xidhaalayaasha, isagoo bixinaya wax-qabadyo iyo laylisyo maskaxeed oo la taaban karo, kuwaasoo saacado badan maaweelin kara, misna kor u qaadi kara garaadka ilmaha, kuna dhalinaya fikir iyo feejignaan badan, maadaama ay inta badan ku hawlan yihiin raadinta iyo helidda ereyada qarsoon.

Buugani waxaynu ugu talagalnay ubadkeena iyo akhristayaasha da’da yar, ee fahmi kara misna akhrin kara afkeena hooyo, ama ugu yaraan isku beeg-beegi kara ereyada xusan.

Buugani waa mid dhamays ah, oo leh ilaa saddex heer oo kala sarreeya, isla mar ahaantaana kala adag, heer walbana uu watto xamaasadiisa, isagoo ku bilaabmaya heerka fudud, si tartiib tartiib ahna u adkaanaya, taasoo keenaysa in aanay ubadku ka xiiso dhicin buugan, inta ay ku guda jiraan xallinta hal-xidhaalayaasha.

Buugani waxa uu ka kooban yahay ilaa 100 eray oo hal-xidhaale ah oo ku saabsan xayawaanada, kuwaasoo si taxaddar leh loo habeeyey, si uu ugu habboonaado danaha iyo heerka ubadkeena. Ereyaduna waa kuwo si cad u muuqda, taasoo fududeyneysa in la akhriyo lana helo eraygii la raadinayay.

Intaa uun ma ahee, buugani wuxuu sidoo kale ubadkeena si toos ah iyo si dadbanba u barayaa misna u wanaajinayaa heerkooda aqooneed ee ku saabsan xayawaanada, iyo higaadooda afeed, iyagoo la kulmaya magacyo hor leh oo cusub.

Ka waalid ahaan, ama ka mas’uul ahaan, hadii aad ilmahaaga ama ilmaha aad mas’uulka u tahay la doonayso maaweelin wax tar leh, isla mar ahaantaana wadata aqoon korarsi, doorashada buugani waxay noqon doontaa doorasho la mahadiyo.